പനി

പനി ഒരുത്തനെ പിടികൂടിയിരിക്കുന്നു
അവന്‍റെ ഉരുക്കുമുഷ്ടി വരെ വിറക്കുന്നു
നനയാത്ത കണ്ണുകളില്‍ ചുടുനീര്‍ തിളക്കുന്നു
ലോകം തന്നെ പിടിച്ചടക്കാം എന്ന് കരുതിയിരുന്നു
ഇപ്പോള്‍ അവന്‍റെ കട്ടില്‍ അവന് മതിയായിരിക്കുന്നു
ഇന്നലെ വരെ വിറപ്പിച്ചവന്‍ ഇന്നു കിടന്നു വിറക്കുന്നു

പനി വേറൊരുവനെയും പിടികൂടിയിരുന്നു
അവന്‍റെ കൈകള്‍ ആകാശത്തേക്ക് ഉയര്‍ന്നിരിക്കുന്നു
ഈറനണിഞ്ഞ കണ്ണുകളില്‍ വിനയം പ്രതിഫലിക്കുന്നു
ഈ ലോകം അവനെ എന്നും അത്ഭുതപ്പെടുത്തിയിരുന്നു
അതിനാല്‍ അവന്‍ മറ്റൊരു ലോകത്തിലെ വിജയം കൊതിക്കുന്നു
ഇന്നലെയും ഇന്നും അവനെ ഒരുപോലെ സന്തുഷ്ടനാക്കിയിരുന്നു